āñkhoñ meñ laal Dore se paḌte chale ga.e
aañsū ye kis hunar se pirotā rahā ġhazāl
Bushra Saeed
1983
11 NAZMReal Name: Bushra Saeed
Born: 1983
Bushra Saeed is a contemporary poet whose work has garnered attention for its emotional depth and lyrical beauty. Known for her ability to weave intricate narratives through her verses, Ejaz explores themes of love, identity, and the complexities of the human experience. Her poetry often reflects a keen awareness of societal issues, delving into the struggles and triumphs of individuals navigating the challenges of modern life.
Ejaz’s writing is characterized by its vivid imagery and evocative language, drawing readers into a world where feelings are expressed with both intensity and grace. She has a unique talent for capturing fleeting moments and transforming them into profound reflections on life, love, and loss. Her verses resonate with a sense of authenticity, inviting readers to connect with their own emotions and experiences.
In addition to her exploration of personal themes, Bushra Saeed often addresses broader social issues, using her poetry as a platform for advocacy and awareness. Her commitment to highlighting the voices of the marginalized and the struggles of everyday life adds a layer of depth to her work, making it not only a form of artistic expression but also a call for empathy and understanding.
GHAZAL OF Bushra Saeed
agar aurat kama sakti to
▾
kharī bātoñ kā zā.iqa tursh hotā hai
ba-hasiyat insān
aurat kī zarūrat
kisī mard ko nahīñ
vo girvī rakhī jaa.e
yā bech dī jaa.e
kirā.e pe lī jaa.e
yā yak-musht ḳharīd lī jaa.e
us ke ḳhayālāt kī
bandar-bāñT mumkin nahīñ
hukm kī pābandī kā tauq pahan kar
jīvan kī kuTiyā kā
kirāya adā karte hue
agar aurat kamā saktī to
laatī mard ke liye ḳharīd kar
vo hausla
ki jis se vo apnā chehra
us ke ḳhayāl ā.īne meñ dekh saktā
nā-ḳhush tamām bātoñ ko
insāf ke palḌe meñ taul saktā
adam-e-tahaffuz ke pinjre meñ
tīsre darje ke qaidī kī haisiyat se
agar aurat kamā saktī to
laatī mard ke liye ḳharīd kar
vo mohabbat
jo us kī fitrī zarūrat se māvarā hotī
agar aurat kamā saktī to
mazdur
▾
ek mazdūr
ki jis ke badan ne
ka.ī dinoñ kī an-thak riyāzat
cement ret aur bajrī ke biich kaTī thī
ek pyālī chaa.e kī talab
belche kī miTTī ke saath uchhālī thī
fikr-e-ayāl ko
lohe kī reḌhī pe
īñToñ ke saath dhakelā thā
chand lamhe
sustāne kī ḳhvāhish ko
sabr ke hathauḌe se kuuT Daalā thā
tab jā kar kahīñ
āḳhir kaar
aaj apnī dāvat manānī thī
ghar meñ murġhī pakānī thī
magar chamaktī kirolā kī
damaktī maḳhlūq ko kyā ḳhabar
beach saḌak meñ
jis kā shaper phaTā thā
jo lā-vāris laash kī sūrat paḌā thā
aaj us ne
apnī dāvat manānī thī
ghar meñ murġhī pakānī thī
kachre ka Dher
▾
kāñdhe par qad se lambī borī laTkā.e
ek bachcha
kachre ke us Dher kī jānib lapaktā hai
jahāñ se
naak band kar ke guzarnā bhī dushvār lagtā hai
shaam tak
ġhalāzat ke us pahāḌ se
vo badbū-dār
Dabbe botaleñ aur bosīda kāġhaz chunegā
din Dhale
apnī ḳhvārī kī
sastī mazdūrī jab pā.egā
ghar jaate hue vo
ḳhushī kā raag gā.egā
magar
us kī niilī shaffāf āñkhoñ kā
siyāh ḳhvāb
taaza kachre kā Dher
koī nahīñ sochegā
us kī dūdhiyā jild kī tah meñ
utartī zahrīlī mail
koī nahīñ dho.egā
vo ma.asūm bachcha
kyā hameñ
kabhī nazar nahīñ aa.egā
dard harf chunne lage
▾
us kī mardāngī ko
mere āñsuoñ kī hājat thī
vo merī ruuh ko
is vaqt tak dāġhtā rahā
jab tak us kī poroñ meñ
mard hone kā ehsās nahīñ itrāyā
us ke miTTī vajūd ko
maiñ ne khāre paanī se gūñdh kar
be-hisī kī bhaTTī meñ Daal diyā
vo patthar kā ho gayā
maiñ bain karne lagī
hosh aayā to
usī but ke aage
bachī-khuchī tamannā.eñ bheñT kiiñ
aur sajda-rez ho ga.ī
tapasyā amar huī to
dard harf chunñe lage
aur maiñ nazmeñ gungunāne lagī
Dhol wala
▾
us ne ġhurbat ke badan pe
basantī cholā piilī pagḌī
aur sunahrī jacket sajā.ī hai
vo TuuTī kursī pe
bosīda Dhol se pair Tikā.e
udhḌā vaqt
sabr ke dhāge se siitā hai
sajī-sañvarī gaaḌī
paas se guzre to
aas aañkh meñ chamaktī hai
us kī bhuuk lapaktī hai
apnī ḳhushiyoñ ke āñgan meñ
Dhol kī thaap par
us ke ġham ko nāchtā dekh rahī huuñ
maiñ soch rahī huuñ
us kī dūkān kā mahñgā saudā
kitne saste daam bikā hai
mazhabi peshwa
▾
ḳhudā aur us ke insāf se Darne vaale
ḳhatā-posh kamzor dil
vajūd aur nā-vajūd kā
munāzra karne vaale
shikāriyoñ se behtar haiñ
ki un ke paas
ḳhauf-zada hone ke liye
koī ḳhudā
maujūd nahīñ hotā
vo maz.hab kī musāvāt
tohfoñ se zarb de kar
maslahatoñ meñ taqsīm karte haiñ
aur farz kiye ga.e ḳhudā ko
bhuuk kā kulliya lagā kar
sikke ke barābar le aate haiñ
wirasat
▾
duur kisī bastī kī
nīm-tārīk koTharī meñ
ek tañg chārpā.ī pe
karāhat-zada kokh se
ġhaib kī madad ko pukārtī
aadhī chīḳh
puure jigar se paar huī to
nannhī chalā.ī
dil baiTh ga.e
maañ ufuq ke paar
jā chukī thī
rivāyāt kī qabr meñ
be-hisī kā kafan pahnā ke
use tahzīb se dafn kar diyā gayā
aziyyat meñ mubtalā zehnoñ ko
qismat kī golī de kar
sulā diyā gayā
aur vo nau-maulūd bachchī
apnī janm-jalī maañ se
nahīñ kah paa.ī
dekh
virāsat terā ḳhuun piine ke ba.ad
merī ek aur maañ
khojne nikal paḌī hai
jawaz
▾
ḳhayāl ke dastar-ḳhvān se
lazīz zā.iqe chakhtī mohabbat
adhūrī ziyāfat se
bhuuk miTāne kī aadī hai
garm fazā
joshīlī ret se
mastī meñ magan hai
jis sahrā ke dāman meñ
merā ḳhema gaḌā hai
vahīñ kuchh fāsle se
merā ghoḌā
chābuk ke raqs kā muntazir hai
naqshe par ubhre dariyā kī taraf pesh-qadmī kā
ijāzat-nāma to mil chukā
magar maiñ ḳhud-aziyyatī kī
tārīḳhī tartīb meñ
radd-o-badal se inkārī huuñ
jis vaadī meñ
muskurāhaToñ kā zāfrānī sūraj
aur vasl ke kāsnī chāñd kā baserā hai
maiñ us maskan kī taraf
nahīñ lauT saktī
agarche merī majbūr mohabbat
merī ḳhud-sāḳhta zad se tang hai
magar maiñ kyā karūñ
maiñ ne mahrūm insānoñ ke
mushtarka sarmā.e meñ
apnā hissa Daal rakhā hai
wijdan
▾
jab merī miTTī aur zamīn
sard safed chādar meñ lipTī
hijr kī rut meñ
sochoñ meñ ḳhizāñ kī zardī milā dī
maiñ ne harf-e-duā
qirtās-e-qalb par
terī yaad kī raushnā.ī se likhā
aur mohabbat ne
ashkoñ kī muhr lagā.ī
qubūliyat kā talabgār
merā junūn
kisī khaa.ī se
ek qadam kī duurī par khaḌā
āḳhirī samt
nahīñ dekh saktā
be-qarār dil
aur ruḳhsār kā til
āsūda ḳhayāl kī āmezish ko
miTTī ke murakkab se
judā karne kā nusḳha nahīñ jānte
magar āyat-e-vasl ke dard se
ye mo.ajiza huā
mujhe zarūrat aur fitrat se māvarā
mohabbat kī ma.anaviyyat kā
qutbī sitāra nazar aane lagā
dhabba
▾
jaane kaise
aur kab
havā ko patā chalā
us dhabbe kā
jo chhupāyā gayā na dhoyā
jise tā-umr chhupāne ke liye
vo numāyāñ huī
vo ik lakīr
jo baḳht meñ likhī ga.ī
ain vast meñ badan ke khīñchī ga.ī
us kī beTī
ab tak ye sochtī hai
ye kis karam kā phal hai
kis jurm kī sazā
SHER OF Bushra Saeed
bas ik yahī to ḳharābī hai us kī fitrat meñ
vo mujh ko yaad to kartā hai par zarūrat meñ
E-BOOKS
No E-Books found for this poet.
