Poet

use tum se mohabbat hai ġhalat-fahmī meñ mat rahnā
ye bas dil kī sharārat hai ġhalat-fahmī meñ mat rahnā

tumhī ko dekh kar vo muskurātā hai to hairat kyā
use hañsne kī aadat hai ġhalat-fahmī meñ mat rahnā

hue barbād to ab āh-o-zārī kar rahe ho tum
kahā bhī thā siyāsat hai ġhalat-fahmī meñ mat rahnā

maiñ tujh ko chāhtā huuñ baat ye sach hai magar phir bhī
mujhe terī zarūrat hai ġhalat-fahmī meñ mat rahnā hī

jhukī nazroñ se taknā aur ḳhamoshī se guzar jaanā
mohabbat kī rivāyat hai ġhalat-fahmī meñ mat rahnā

kiyā kartā huuñ ‘rāhī’ us kī tārīfeñ sabab ye hai
vo mujh se ḳhūbsūrat hai ġhalat-fahmī meñ mat rahnā

kasak dil kī miTāne meñ zarā sī der lagtī hai
kisī kā ġham bhulāne meñ zarā sī der lagtī hai

kisī ko chaah kar apnā banānā Thiik hai lekin
mohabbat āzmāne meñ zarā sī der lagtī hai

tumheñ paane kī ḳhvāhish meñ huā ehsās ye mujh ko
muqaddar āzmāne meñ zarā sī der lagtī hai

jise minnat murādoñ se baḌī mushkil se paayā ho
use dil se bhulāne meñ zarā sī der lagtī hai

ki jis dil kī zamīñ barsoñ se banjar ho to phir us par
na.ī chāhat ugāne meñ zarā sī der lagtī hai

ġhazal paḌh kar to āsānī se mahfil luuT sakte ho
magar izzat kamāne meñ zarā sī der lagtī hai

dil-e-muztar ko āḳhir kaun samjhā.egā ai ‘rāhī’
sukūn-e-qalb paane meñ zarā sī der lagtī hai

jise ham kah sakeñ apnā koī aisā nahīñ miltā
tire hamnām milte haiñ koī tujh sā nahīñ miltā

mohabbat ke safar meñ haiñ musāfir ham musāfir tum
hameñ manzil nahīñ miltī tumheñ rasta nahīñ miltā

kisī kī ruḳhsatī ke baad tanhā.ī ke aalam meñ
ġhamoñ kā saath hotā hai koī tanhā nahīñ miltā

samajh lenā koī maqsad hai us kī chāplūsī meñ
jhukā kar sar koī iḳhlās se itnā nahīñ miltā

jidhar dekho udhar sach bolne vaale hī milte haiñ
ta.ajjub hai koī is daur meñ jhūTā nahīñ miltā

talab hai raushnī kī to jalāo ḳhud diyā ‘rāhī’
bujhāne tishnagī pyāse kī to dariyā nahīñ miltā

tujhe yaad kar ke bhulāne se pahle
maiñ royā bahut muskurāne se pahle

ki ro-ro ke sonā to hañs-hañs ke uThnā
ham aise na the dil lagāne se pahle

mire ḳhvāb rah jaa.eñ na phir adhūre
jabīñ chuum lenā jagāne se pahle

tum apnī tabāhī kā mātam to kar lo
mire haal pe muskurāne se pahle

bahut yaad aa.egī pāgal sī laḌkī
ye sochā nahīñ thā bhulāne se pahle

maiñ TuuTā maiñ bikhrā huā reza-reza
mirī jaañ tire ḳhat jalāne se pahle

tumheñ sirf ranj-o-alam hī mileñge
zarā soch lo dil lagāne se pahle

ġhazal pesh-e-ḳhidmat hai ‘rāhī’ kī sun lo
kahā us ne sab ko sunāne se pahle

jin logoñ se merī yaarī hotī hai
un meñ koī baat to pyārī hotī

duniyā meñ ik shaḳhs hī pyārā lagtā hai
ham aisoñ meñ ye bīmārī hotī hai

jab bhī apne yāroñ se miltā huuñ maiñ
jaane kyoñ bas baat tumhārī hotī hai

sab ko dil kā raaz batānā Thiik nahīñ
duniyā-dārī duniyā-dārī hotī hai

jhuuT bahut āsān hai lekin ai ‘rāhī’
sach kahne meñ kuchh dushvārī hotī hai

gard jam jaa.e to shīsha nahīñ dekhā jaatā
ya.anī tasvīr ko dhuñdlā nahīñ dekhā jaatā

tishnagī aa tujhe dariyā ke havāle kar duuñ
tujh ko is haal meñ pyāsā nahīñ dekhā jaatā

tum mirā nām-o-nasab pūchh rahe ho sab se
ishq ho jaa.e to shajara nahīñ dekhā jaatā

lauT aane kī tasallī tirī jhūTī hī sahī
ab to muḌ-muḌ ke yuuñ rasta nahīñ dekhā jaatā

sher achchhe jo bure lagte haiñ duniyā ko mire
ho ġhazal meñ tirā charchā nahīñ dekhā jaatā

log milte haiñ bichhaḌte haiñ magar kyoñ mujh se
yuuñ tirā chhoḌ ke jaanā nahīñ dekhā jaatā

izz-o-tauqīr kā ye haal hasad meñ ham se
qad kisī kā bhī ho ūñchā nahīñ dekhā jaatā

hai asar is tarah dil par ishq kī tāsīr kā
āj-kal hai haal jaisā vādī-e-kashmīr kā

yuuñ to duniyā kā koī manzar mujhe bhāyā nahīñ
haañ magar shaidā huā huuñ maiñ tirī tasvīr kā

hai mirī duniyā meñ terī ahmiyat kuchh is tarah
martaba hai shā.erī meñ jis tarah se ‘mīr’ kā

yaad tum aaoge mujh ko merī jaañ ye jaan lo
zikr jab bhī aa.egā merī ġhazal meñ hiir kā

maiñ ne to bas ain likkhā thā lifāfe par magar
jaane kyā samjhā hai matlab us ne is tahrīr kā

tum se milnā aur phir mil kar bichhaḌ jaane kā ġham
faisla shāyad yahī hai kātib-e-taqdīr kā

sher maiñ ne bhī sunā.e ḳhuub ‘rāhī’ rāt-bhar
zikr chheḌā thā kisī ne bazm meñ jab ‘mīr’ kā

us ne ye fāsla is vāste rakkhā hogā
paas aa kar mire baiThegā to charchā hogā

aaj phir us ne mujhe yaad kiyā hai shāyad
dil ne yūñhī to nahīñ shor machāyā hogā

dekhnā log mohabbat kī misāleñ deñge
naam aa.egā mirā zikr tumhārā hogā

dard bechainī taḌap ranj-o-alam tanhā.ī
ham ne sochā hī nahīñ itnā ḳhasāra hogā

jis ko din-rāt duāoñ meñ hai māñgā ham ne
vaqt aa.egā kisī din vo hamārā hogā

hijr is vāste manzūr kiyā hai maiñ ne
terā har zaḳhm mujhe dil se gavārā hogā

us kī bechainī batātī hai ki aadil ‘rāhī’
bhūlā-bisrā hī koī yaad to aatā hogā

hijr kā sog manānā kabhī dariyā ronā
yaad kar ke tujhe hañsnā kabhī ronā ronā

kyā batā.ūñ use kis baat pe hañste dekhā
kyā batā.ūñ mujhe kis baat pe aaya ronā

kaise bhūlūñgā vo bebāk adā.eñ us kī
us kī bāteñ to vo hañsnā vo lipaTnā ronā

baat auroñ kī nahīñ tū to mirā apnā thā
kaash tujh ko nazar aatā mire dil kā ronā

koī to baat use itnā rulātī hogī
achchhā lagtā hai kise TuuT ke tanhā ronā

tum to ḳhush the na mujhe chhoḌ ke jāte-jāte
vaqt-e-ruḳhsat tumheñ kis baat pe aaya ronā

muddatoñ baad ye ehsās huā hai ‘rāhī’
muddatoñ baad phir aaya mujhe itnā ronā

maiñ na kahtā thā mire yaar badal jaatā hai
vaqt kitnā bhī ho dushvār badal jaatā hai

maiñ ne bas dil kī sunī varna tire baare meñ
log kahte the ḳhabar-dār badal jaatā hai

hākim-e-vaqt yuuñ maġhrūr na ban hosh meñ aa
piir aatā hai to itvār badal jaatā hai

tujh pe kaise ho yaqīñ mujh ko ki ab tū yaksar
apnā kahtā to hai har baar badal jaatā hai

ye nazākat ye dikhāvā ye takabbur achchhā
yā’nī daulat se bhī me’yār badal jaatā hai

dekhne vaalo haqārat se na dekho mujh ko
bhuuk se jism kā ākār badal jaatā hai

kyā batā.ūñ ki mohabbat ke safar meñ ‘rāhī’
ġham to rah jaatā hai ġham-ḳhvār badal jaatā hai

apnī āñkhoñ se tabāhī ye nazāra dekhūñ
yā’nī tujh ko maiñ kisī aur kā hotā dekhūñ

merī dīvāngī is moḌ pe le aa.ī hai
har kisī chehre meñ bas ek hī chehra dekhūñ

ye jo tasvīr musavvir ne banā.ī varna
chāñd ko Thahre hue paanī meñ chaltā dekhūñ

tishnagī laakh sahī par ye nahīñ ho saktā
ḳhud ko lāchār banā.ūñ sū-e-dariyā dekhūñ

ye tirī zid ki taḌaptā huā dekhe mujh ko
merī ḳhvāhish ki hamesha tujhe hañstā dekhūñ

sāmne tujh ko biThā.ūñ tirā māthā chūmūñ
terī āñkheñ tirī zulfeñ tirā chehra dekhūñ

do qadam chal ke ye dil ne kahā ‘ādil-rāhī’
āḳhirī baar palaT kar use jaatā dekhūñ

tū ne hī har qadam pe diyā hausla mujhe
yārab nahīñ hai tere sivā aasrā mujhe

ik baar us ne kah to diyā dilrubā mujhe
taktā rahā maiñ aa.ine ko aa.ina mujhe

jin ke liye sanad thī mirī baat kal talak
dene lage haiñ aaj vahī mashvara mujhe

college meñ is liye bhī to jaatā rahā ki vo
ai kaash ik nazar hī sahī dekhtā mujhe

nārāz apne aap se huuñ maan yā na maan
tujh se shikāyateñ haiñ na koī gila mujhe

har aan har ḳhushī hai milī is ke bāvajūd
kyoñ lag rahī hai zindagī merī sazā mujhe

hāfiz mirā ḳhudā hai so kahnā fuzūl hai
apne sivā kisī kā nahīñ aasrā mujhe

is ‘ain shiin qaaf meñ ik pal sukūñ nahīñ
detā hai jaise ‘rāhī’ koī bad-du’ā mujhe

terī har baat pe tanqīd nahīñ kar saktā
haañ magar jhuuT kī tā.īd nahīñ kar saktā

tū agar jaan bhī māñge to ḳhushī se de duuñ
maiñ tire hukm kī tardīd nahīñ kar saktā

āḳhirī ‘ishq kiyā maiñ ne magar pahlī baar
dūsrī baar ye tafrīd nahīñ kar saktā

maiñ ne dekhā hai badaltā huā lahja terā
is liye tujh se to ummīd nahīñ kar saktā

tū ne is haal meñ chhoḌā hai ki allāh allāh
‘iid kā din hai magar ‘iid nahīñ kar saktā

ye alag baat suḳhanvar huuñ maiñ ‘ādil-rāhī’
dard itne haiñ ki tasvīr nahīñ kar saktā

gulāb rangoñ ko zā’frānī nahīñ karūñgā
maiñ aise paudoñ kī bāġhbānī nahīñ karūñgā

kisī kī ḳhātir ġhalat-bayānī nahīñ karūñgā
maiñ jhūTe logoñ kī tarjumānī nahīñ karūñgā

sunā hai ab vo ḳhilāf mere gavāhī degā
jo kah rahā thā ki bad-gumānī nahīñ karūñgā

sazā maiñ ḳhud ko kabhī na dūñgā tire kiye kī
jigar ko chhalnī lahū ko paanī nahīñ karūñgā

tumhāre ġham kā tumhārī yādoñ kā maiñ amiiñ huuñ
kahā thā tum se ki be-imānī nahīñ karūñgā

mu’āf tujh ko maiñ pahle bhī kar chukā huuñ lekin
dubāra tujh par ye mehrbānī nahīñ karūñgā

ye ġhair-mumkin hai phir bhī hākim banā to ‘ādil’
sitam-rasīdoñ pe hukmrānī nahīñ karūñgā