Poet

āñkhoñ ko ab nigāh kī aadat nahīñ rahī
ab kuchh bhī dekhne kī zarūrat nahīñ rahī

sachchā.iyoñ kī raah bahut ho ga.ī kaThin
is rāste pe chalne kī himmat nahīñ rahī

dushman ho dost ho koī apnā ki ġhair ho
ham ko to ab kisī kī bhī hājat nahīñ rahī

duniyā azīz-tar rahī ik arsa-e-darāz
lekin ab is kī bhī to mohabbat nahīñ rahī

arsa huā kisī ne pukārā nahīñ mujhe
shāyad kisī ko merī zarūrat nahīñ rahī

kāñTā sā ek dil meñ khaTaktā hai mustaqil
par dil kī baat kahne kī aadat nahīñ rahī

sarmāya-e-hayāt huā chāhtā hai ḳhatm
jis par ġhurūr thā vahī daulat nahīñ rahī

‘bushrā’ kabhī jo jaao vahāñ arz-e-hāl ko
kahnā ki ham pe ab vo ināyat nahīñ rahī

sar-e-dasht dil jo sarāb thā koī ḳhvāb thā
mirī ḳhvāhishoñ kā azaab thā koī ḳhvāb thā

tirī ḳhushbuoñ kī talāsh meñ mirā rāz-dāñ
vahī ek kunj-e-gulāb thā koī ḳhvāb thā

vo jo chāñd thā sar-e-āsmāñ koī yaad thī
jo guloñ pe ahd-e-shabāb thā koī ḳhvāb thā

jo na kaT sakā vo nishān thā kisī zaḳhm kā
jo na mil sakā vo sarāb thā koī ḳhvāb thā

dil ke zaḳhmoñ kī chubhan dīda-e-tar se pūchho
mere ashkoñ kā hai kyā mol guhar se pūchho

ghar jalā baiThe charāġhoñ kī havas meñ āḳhir
ghar kī qīmat to kisī ḳhāk-basar se pūchho

ye to ma.alūm hai maiñ samt-e-safar kho baiThī
tum isī baat ko andāz-e-digar se pūchho

ret uḌtī hai sujhā.ī nahīñ detā kuchh bhī
kaT sakegī kabhī ye raat sahar se pūchho

yuuñ to majnūñ bhī huā kohkan o mansūr hue
ghāyal ab kaun huā tīr-e-nazar se pūchho

log kahte haiñ mujhe sañg-e-sar-e-rah ‘bushrā’
qadr-o-qīmat mirī kuchh ahl-e-hunar se pūchho

abhī bādaloñ kā safar kahāñ mire mehrbāñ
abhī qaid huuñ sar-e-āshiyāñ mire mehrbāñ

rahe fāsle mirī dastaras meñ tamām din
magar ab to shaam kā hai samāñ mire mehrbāñ

sabhī pursish-e-ġham-e-jāñ ke vāste aa.e the
mire chārāgar mire nauha-ḳhvāñ mire mehrbāñ

vahī lafz haiñ durr-e-be-bahā mire vāste
jinheñ chhū ga.ī ho tirī zabāñ mire mehrbāñ

sabhī marhale rah-e-shauq ke the nigāh meñ
mire hausle rahe nā-tavāñ mire mehrbāñ

kabhī gardish-e-shab-o-roz se na amaañ milī
mire sar pe kab na thā āsmāñ mire mehrbāñ