Imtiyaz Khan
1989
One of the young poets of the new generation, known...Real Name: Imtiyaz Khan
Born: 1989
Imtiaz Khan was born on May 20, 1989 in Mewat, Haryana. He received his early education in his hometown, after which he graduated with a degree in Computer Science Engineering. Today he is working as an Engineer in Delhi Metro Corporation and based in Delhi.
During his days as a student, the literary atmosphere of Delhi nurtured your literary tastes and attracted you to practice poetry. As far as poetry is concerned, it has a wide range of imagination and artistic use of language.
Some of the ideas in his poems are so penetrative that the windows of meaning of these poems open up differently every time you read them. You have made both ghazal and Nazms a source of expressing your thoughts. Besides being a good-natured person, he is a very aware and sensile individual and the expression of this sensitivity is evident in your poetry.
GHAZAL OF Imtiyaz Khan
vo tabassum thā jahāñ shāyad vahīñ par rah gayā
merī āñkhoñ kā har ik manzar kahīñ par rah gayā
maiñ to ho kar aa gayā āzād us kī qaid se
dil magar is jald-bāzī meñ vahīñ par rah gayā
kaun sajdoñ meñ nihāñ hai jo mujhe dikhtā nahīñ
kis ke bose kā nishāñ merī jabīñ par rah gayā
ham ko aksar ye ḳhayāl aatā hai us ko dekh kar
ye sitāra kaise ġhalatī se zamīñ par rah gayā
ham laboñ ko khol hī kab paa.e us ke sāmne
ik nayā ilzām phir dekho hamīñ par rah gayā
tū nahīñ hogā magar ye silsilā rah jā.egā
tere hone kā tasavvur jā-ba-jā rah jā.egā
qurbatoñ kī raah se ho kar guzar jā.eñge ham
manziloñ par darmiyāñ bas fāsla rah jā.egā
kis ne sochā thā ki ye itnā hasīñ ik vāqi.a
ek din siine meñ ban kar hādsa rah jā.egā
rāh-e-dil ko rauñd kar aage nikal jā.eñge log
aañkh meñ uThtā ġhubār-e-qāfila rah jā.egā
maiñ kahīñ kho jā.ūñgā le kar nigāh-e-shuq-e-dīd
tū charāġh-e-husn le kar DhūñDhtā rah jā.egā
kyā yūñhī ḳhāmosh duniyā se guzar jā.eñge ham
kyā jo kahnā hai vo sab kuchh an-kahā rah jā.egā
jab kahīñ kuchh bhī nahīñ thā bas ḳhudā thā aur phir
jab kahīñ kuchh bhī na hogā bas ḳhudā rah jā.egā
nashe meñ ye kyā samajh liyā thā
ḳhudā ko banda samajh liyā thā
zarā sī chup thī usī ko tum ne
na jaane kyā kyā samajh liyā thā
hasīñ thā vo is qadar ki ham ne
nazar kā dhokā samajh liyā thā
maiñ aisā pāgal diyā thā jis ne
havā ko apnā samajh liyā thā
ham us ke dil tak pahuñchte kaise
badan ko rāsta samajh liyā thā
use yuuñ chhoḌā ki us ne ham ko
bahut ziyāda samajh liyā thā
ham apnī ġhalatī se bik ga.e haiñ
tumheñ zuleḳhā samajh liyā thā
hamārī sāda-dilī to dekho
ḳhudā ko apnā samajh liyā thā
milan judā.ī taḌap udāsī
ye khel saarā samajh liyā thā
tumhārī āñkheñ samajh na paa.e
har ik muamma samajh liyā thā
lab us ne khole nahīñ the phir bhī
javāb us kā samajh liyā thā
vo āñkheñ ka.aba sifat thī jin ko
sharāb-ḳhāna samajh liyā thā
VIDEOS
THIS VIDEO IS PLAYING FROM YOUTUBE
NEXT GHAZAL
yūñhī aksar mujhe samjhā bujhā kar lauT jaatī hai
kisī kī yaad mere paas aa kar lauT jaatī hai
maiñ bad-qismat vo gulshan huuñ ḳhizāñ jis kā muqaddar hai
bahār aatī hai darvāze se aa kar lauT jaatī hai
use apnā banāne meñ bhī ik anjān sā Dar hai
duā hoñToñ talak aatī hai aa kar lauT jaatī hai
maiñ apnī qaid ko hī apnī āzādī samajh lūñgā
rihā.ī mujh ko zanjīreñ lagā kar lauT jaatī hai
agar itnī hī sarkash hai to mujh pe kyuuñ nahīñ girtī
vahī bijlī jo merā ghar jalā kar lauT jaatī hai
vahāñ par bhī charāġh-e-ārzū ham ne jalā.e haiñ
jahāñ se raushnī bhī sar jhukā kar lauT jaatī hai
use maiñ dekh to letā huuñ lekin chhū nahīñ paatā
koī shai hai jo mere paas aa kar lauT jaatī hai
hijr meñ āñkheñ aañsū ban kar bah jaatī haiñ sochā na.iiñ
vo bhī us din ġhusse meñ thā aur maiñ ne bhī rokā na.iiñ
kitnā mushkil hai ye kahnā maiñ terā ho saktā na.iiñ
phir bhī maiñ tujh ko ye dukh to de saktā huuñ dhoka na.iiñ
ek jagah par Thahrī āñkheñ gahrī socheñ ḳhāmoshī
kab tak ḳhud pe zulm karoge is ko vāpas aanā na.iiñ
is se bichhaḌ kar soch rahā huuñ us ko bhulāne kī tarkīb
log sharāb piyā karte haiñ maiñ cigarette tak piitā na.iiñ
shikve mujh ko bhī hote haiñ merā dil bhī dukhtā hai
apne andar ghuT jaatā huuñ merī jaan maiñ kahtā na.iiñ
kis darja nuqsān uThāyā hai ham ishq faqīroñ ne
jitnā tujh ko kho baiThe haiñ utnā tujh ko paayā na.iiñ
ye pariyoñ se chehre jin par jaan chhiḌakte haiñ ham log
mujh ko in peḌoñ ke nīche dhuup milī hai saaya na.iiñ
kitnī ummīdeñ hotī haiñ un ko ik haañ sunñe kī
lekin aksar pūchhne vāloñ ke hisse meñ aayā na.iiñ
tirī fuzūl bandagī banā na de ḳhudā mujhe
maiñ kyā huuñ aur tū samajh rahā hai jaane kyā mujhe
na tū nazar meñ hai kahīñ na dasht hai na shahr hai
ye kis ḳhalā meñ khīñch laa.e tere naqsh-e-pā mujhe
tū apnā kaam kar guzar mujhe koī gila nahīñ
jo vaqt ne banā diyā havā tujhe diyā mujhe
tujhe hī sochte hue phir aaj so gayā huuñ maiñ
guzar tirā ho ḳhvāb se to niiñd se jagā mujhe
vahāñ se dekhtī hai kyā havā-e-dast-e-māriyā
zarā mire qarīb aa maiñ ḳhaak huuñ uḌā mujhe
maiñ jānte hue bhī sab ḳharīdtā chalā gayā
vo ashk bechtā rahā batā ke qahqaha mujhe
mile tamām log zindagī kī dhūp-chhāñv meñ
bas ek ‘imtiyāz’ hī kahīñ nahīñ milā mujhe
ek tasvīr āñkhoñ meñ aatī huī ek jaatī huī
phir vahī shaam hai phir vahī yaad hai dil dukhātī huī
shab ke dariyā meñ uThtī hai ik mauj-e-māzī balā-ḳhez kyuuñ
lauT jaatī hai kyuuñ sāhil-hāl se sab miTātī huī
aur kyā hone vaalā hai ab jo abhī tak nahīñ ho sakā
sun rahā huuñ kahīñ duur se phir sadā kun kī aatī huī
vaqt to kuchh lagegā par āḳhir ye kohsār kaT jā.egā
dard kī ik nadī mere siine se rāsta banātī huī
ek gul thā kahīñ par akelā udāsī meñ Duubā huā
ek titlī ḳhayāloñ meñ aatī huī muskurātī huī
dil samundar meñ Duube hue saare lafzoñ kī lāsheñ liye
kashtiyoñ āñso.oñ kī chalī aatī haiñ Dagmagātī huī
titliyāñ mere kamre meñ uḌtī huī jharnā bahātā huā
ik parī-zād apne vatan kī kahānī sunātī hoī
kākul-o-chashm-o-lab-o-ruḳhsār kī bāteñ karo
zulmat-e-daurāñ meñ husn-e-yār kī bāteñ karo
kaun kyuuñ le kar chalā aatā hai un kā qāfila
āñso.oñ ke qāfila-e-sālār kī bāteñ karo
koī chāhe yā na chāhe ye safar hai nā-guzīr
kārvān-e-vaqt kī raftār kī bāteñ karo
ḳhanjaro kuchh to sar-e-maqtal pe ho.e tabsira
āriyo kaaTe ga.e ashjār kī bāteñ karo
kyā nahīñ mumkin ki ho hālāt pahle kī tarah
kyā zarūrī hai ki tum pindār kī bāteñ karo
vā.izo ab ke sharāb-e-ishq par taqrīr ho
mai-kashoñ allāh ke dīdār kī bāteñ karo
be-qarārī kā sabab banñe lagī dānishvarī
ab sukūñ darkār hai be-kār kī bāteñ karo
jo un meñ ho rahā hai vo tamāshā bhī nahīñ dikhtā
huā kyā hai un āñkhoñ ko jo itnā bhī nahīñ dikhtā
tire parda-nashīñ hone meñ to hairat hī kyā lekin
tū jis parde meñ pinhāñ hai vo parda bhī nahīñ dikhtā
ye kaise ālam-e-tīra-shabī meñ aa gayā huuñ maiñ
yahāñ to koī jugnū se shanāsā bhī nahīñ dikhtā
ḳhudā ko dekh kar mānūñ ye zid bhī ḳhuub hai lekin
in āñkhoñ ko zarūrat se ziyāda bhī nahīñ dikhtā
ḳhvāboñ kā sailāb nahīñ dekhā jaatā
nīñd-nagar ġharqāb nahīñ dekhā jaatā
jaane vaale merī āñkheñ bhī le jā
in ko yuuñ betāb nahīñ dekhā jaatā
itnā kah kar ek shanāvar Duub gayā
afsurda girdāb nahīñ dekhā jaatā
jaane us kā chehra kaise dekheñge
jis kā nūr-naqāb nahīñ dekhā jaatā
ham ne saara gulshan jalte dekhā hai
tum se ek gulāb nahīñ dekhā jaatā
pas-e-gardūñ kisī ne naam bolā thā hamārā
badan kī qaid se haa.e rihā honā hamārā
yuuñ ḳhud ko chhoḌ kar nikle kisī kī justujū meñ
hamīñ ne umr-bhar phir rāsta dekhā hamārā
kisī kā aks ham par rah gayā yā aa.ine par
ki apne-āp se chehra nahīñ miltā hamārā
baḌī muddat se is kī dhuup jhele jā rahe haiñ
paḌegā shams par bhī ek din saaya hamārā
taḌaptī hai sisaktī hai yahāñ rah kar musalsal
ye kis kī ruuh hai jis ne badan pahnā hamārā
nishāne par dil-e-majrūh āḳhir kyuuñ hamesha
sitamgar kyā tujhe ye sar nahīñ dikhtā hamārā
banā ke rāz-e-dil har haal meñ vo shaḳhs ham ko
rakhegā yaad par charchā nahīñ hogā hamārā
SHER OF Imtiyaz Khan
No Sher found for this poet.
E-BOOKS
No E-Books found for this poet.
